(वाई प्रतिनिधी : प्रशांत थोरवे)
वाई नगरपालिकेच्या २०२५–२०३० या पंचवार्षिक निवडणुकीसाठी दाखल झालेल्या उमेदवारी अर्जांची छाननी प्रक्रिया मंगळवारी पूर्ण झाली असून एकूण १७ अर्ज बाद झाले आहेत. ही प्रक्रिया नगरपालिका प्रशासकीय इमारतीमध्ये पार पडली.
नगराध्यक्षपदासाठी दाखल झालेल्या ९ अर्जांपैकी १ अर्ज बाद झाला असून ८ उमेदवार रिंगणात कायम आहेत. तर नगरसेवकपदासाठी आलेल्या १०५ अर्जांपैकी ८९ अर्ज वैध ठरले आहेत.
राजकीय पक्षांचा ‘एबी’ फॉर्म नियोजित मुदतीत न जमा झाल्याने १७ अर्ज बाद झाल्याची माहिती निवडणूक निर्णय अधिकारी तथा तहसीलदार सोनाली मेटकरी यांनी दिली.
*राजकीय समीकरणे* : तिरंगी की चौरंगी?
वाई शहरातील नगराध्यक्ष पदाची लढत यंदा तिरंगी नव्हे तर चौरंगी स्वरूप घेण्याची चिन्हे स्पष्ट दिसत आहेत. उमेदवारांची संख्या मोठी असल्याने बंडखोरीची शक्यता कायम असून राजकीय वातावरण तापले आहे.
*भाजप – अनिल सावंत आघाडीवर*
राष्ट्रवादी काँग्रेसमधून भाजपमध्ये प्रवेश केलेले अनिल सावंत हे भाजपचे नगराध्यक्षपदाचे उमेदवार आहेत.पूर्वी राष्ट्रवादी काँग्रेसमध्ये असताना मंत्री मकरंद पाटील यांच्या मार्गदर्शनाखाली शहरात मोठा निधी आणल्याचा त्यांना लाभ होत असून त्यांची उमेदवारी भक्कम मानली जात आहे. पक्षातील काही नाराजांची कुजबुज असली तरी त्याचा प्रत्यक्ष फायदा सावंत यांनाच होईल, असे राजकीय वर्तुळात बोलले जात आहे.
*राष्ट्रवादी काँग्रेस* – नितीन कदमांची भक्कम तयारी
शैक्षणिकदृष्ट्या वरचढ आणि राजकीय पार्श्वभूमी असलेले प्रा. डॉ. नितीन कदम यांनी पूर्वी माजी आमदार मदनदादा भोसले यांच्यासोबत काम केले आहे.
राष्ट्रवादी काँग्रेसमध्ये प्रवेश केल्यानंतर त्यांनी मजबूत जनसंपर्क आणि संघटन उभारले असून या लढतीत तेही केंद्रस्थानी आहेत.
*शिवसेना* – प्रवीण शिंदे मैदानात
शिवसेनेतून प्रवीण दिनकर शिंदे हे नगराध्यक्षपदासाठी उत्स्फूर्तपणे रिंगणात उतरले आहेत.
त्यांच्या कुटुंबाचा शहरातील जुना राजकीय वारसा मजबूत असून त्यांची काकी पूर्वी नगरसेविका राहिल्याने शिंदे यांना सशक्त आधार प्राप्त आहे. त्यामुळे तेही प्रबळ दावेदार मानले जातात.
*काँग्रेस* – प्रदीप जायगुडे यांचे नेतृत्व राष्ट्रीय काँग्रेसचे उमेदवार प्रदीप जायगुडे हे वाई शहरातील परिचित सामाजिक आणि राजकीय व्यक्तिमत्त्व.त्यांच्या उमेदवारीमुळे काँग्रेसलाही या मैदानात लक्षवेधी उपस्थिती मिळाली आहे.
*राष्ट्रवादी शरद पवार गट* – तेजपाल वाघ रंगत वाढवणार
राष्ट्रवादी काँग्रेस शरदचंद्र पवार गटाचे उमेदवार तेजपाल वाघ हे चित्रपटसृष्टीतील नावाजलेले कलाकार आहेत.टीव्ही मालिकांमधील त्यांच्या लोकप्रियतेमुळे त्यांची ओळख घराघरात पोहोचलेली असून ही निवडणूक अधिक रंगतदार होण्यास मदत होत आहे.
*अपक्षांची एन्ट्री* – लढत चौरंगी निश्चित
अपक्ष विजय ढेकाने आणि दीपक जाधव यांनीही नगराध्यक्षपदासाठी अर्ज दाखल केला आहे.घटक समीकरणे बदलल्यास अपक्षांची मते निर्णायक ठरू शकतात.
या निवडणुकीत नामदार मकरंद पाटील (राष्ट्रवादी – अजित पवार गट), माजी आमदार मदनदादा भोसले (भाजप),विकास शिंदे (शिवसेना), रवींद्र भिलारे यांची प्रतिष्ठाही पणाला लागली असून त्यामुळे राजकीय तापमान अधिक चढले आहे.
*वाई शहरात सध्या चर्चेचा केंद्रबिंदू एकच—*
वाई कुणाच्या बाजूने?
*अंतिम निष्कर्ष*
तिरंगी की चौरंगी हा प्रश्न अद्याप अनुत्तरित असला तरी, वाई शहरातील नगराध्यक्षांची लढत यंदा अत्यंत कडवी, चुरशीची आणि प्रतिष्ठेची होणार, हे स्पष्ट झाले आहे.
